ភ្នំពេញ៖ ព្រឹត្តិការណ៍ AFF Championship ឬ AFF Mitsubishi Electric Cup 2022​ នឹងចាប់ផ្តើមការប្រកួតពីថ្ងៃទី២០ ខែធ្នូ ឆ្នាំ២០២២ រហូតដល់ថ្ងៃទី១៦ ខែមករា ឆ្នាំ២០២៣ ដោយការប្រកួតវគ្គចែកពូល (Group Stage) នឹងធ្វើឡើងក្នុងរួបមន្តក្នុងដី-ក្រៅដី (Home-Away) ខណៈកម្ពុជា នឹងទទួលជាម្ចាស់ផ្ទះចំនួន ២ប្រកួត។

ការប្រកួតក្នុងទឹកដីរបស់កម្ពុជា នឹងធ្វើឡើងនៅថ្ងៃទី២០ ខែធ្នូ ឆ្នាំ២០២២ ដោយកម្ពុជា​ ត្រូវទទួលស្វាគមន៍ក្រុមជម្រើសជាតិហ្វីលីពីន ខណៈការប្រកួតក្នុងដីមួយទៀតកម្ពុជា នឹងត្រូវទទួលស្វាគមន៍ក្រុមជម្រើសជាតិប៊្រុយណេ នៅថ្ងៃទី២៩ ខែធ្នូ ឆ្នាំ២០២២ ដែលការប្រកួតទាំងពីរនេះធ្វើឡើងនៅពហុកីឡដ្ឋានជាតិមរតកតេជោដ៏ថ្មីសន្លាងរបស់កម្ពុជា។ ចំពោះការប្រកួតក្រៅដីចំនួន ២ប្រកួតផ្សេងទៀតរួមមាន កម្ពុជា ធ្វើដំណើរទៅប៉ះឥណ្ឌូណេស៊ី នៅថ្ងៃទី២៣ ខែធ្នូ ឆ្នាំ២០២២ នៅកីឡដ្ឋាន Gelora Bung Karno មុននឹងប្រកួតបិទបញ្ចប់ពូល A ជួបម្ចាស់ផ្ទះថៃ នៅថ្ងៃទី០២ ខែមករា ឆ្នាំ២០២៣ នៅកីឡដ្ឋាន Thammasat។

ដោយឡែក​ តាមប្រភពចុងក្រោយរបស់សហព័ន្ធកីឡាបាល់ទាត់កម្ពុជា​ ការប្រកួតទាំងពីររបស់កម្ពុជា នឹងត្រូវធ្វើឡើងនៅវេលាម៉ោង ៥ល្ងាចទាំងអស់ ដែលនេះគឺជាការតម្រូវពីសហព័ន្ធកីឡាបាល់ទាត់អាស៊ីអាគ្នេយ៍។

ចំពោះសំបុត្រនឹងមានដាក់ចាប់ពីថ្ងៃនេះតទៅ ដែលអ្នកគាំទ្រអាចរកជាវសំបុត្រចូលរួមទស្សនាការប្រកួតពានរង្វាន់ AFF Championship របស់ក្រុមជម្រើសជាតិកម្ពុជាបានដោយផ្ទាល់នៅតាមទីតាំងទាំង ៤ ដូចខាងក្រោម៖

- ពហុកីឡដ្ឋានជាតិអូឡាំពិក (ច្រកទ្វារធំ)

- មជ្ឈមណ្ឌលកីឡា The Blue Sports Center

- ហាងលក់សម្លៀកបំពាក់កីឡា Double H

- ហាងលក់សម្ភារៈកីឡា Fan Sport។